काठमाडौं १८ जेठ । जाजरकोटका दलित युवा नवराज विकसहित ५ जनाको हत्याको घटनाले सिंगो देश स्तब्ध छ । घटनामा एकजना अझै बेपत्ता छन् । कथित उपल्लो जातकी छोरीसँग प्रेम सम्बन्ध भएको र दुलही लिन जाँदा केटी पक्षले निर्घात कुटपिट गरी हत्या भएको भन्दै यो घटनाका बारे सामाजिक सञ्जालमा विभिन्न खाले टिकाटिप्पणी र आलोचना भैरहेको छ ।

नेपाली फिल्मकर्मीहरुले पनि उक्त घटनाको भत्र्सना गरेका छन् । उनीहरुले यो घटनाले विश्वसामु नेपालको शिर झुकेको भन्दै दोषीलाई कारबाही गर्न सरकारसँग माग गरिरहेका छन् । अभिनेता राजेश हमालले पनि हत्यामा संलग्न व्यक्तिलाई कानुन बमोजिम सजाय दिनुपर्ने बताएका छन् । जाजरकोटमा भएको घटनाले आफूलाई स्तब्ध मात्र नभइ आक्रोशित पनि बनाएको उनी बताउँछन् ।

शनिवार साँझ एक भिडियो सन्देशमार्फत् उनले एउटा व्यक्तिले अर्को व्यक्ति वा एउटा समुदायले अर्को समुदायलाई जात, पृष्ठभूमि र पेशाको आधारमा गालीगलौच, अपमान र अपराधिक क्रियाकलाप गर्ने अधिकार नभएको भन्दै त्यस्तो व्यबहार गर्ने व्यक्ति अपराधी रहेको बताएका छन् । त्यसप्रकारका व्यक्तिलाई कानुन बमोजिम कारबाही गर्नुपर्ने उनको माग छ ।